مرثية علي بن مبارك الكدادي في ابوه

مرثية تدمي القلوب وتذرف الدموع للشاعر علي بن مبارك بن عامر الكدادي
في رثاء والده رحمة الله عليه

قالوا رثيته ؟ قلت وشلون ابَرثيه !!=ابوي مايوفيه شعر وقصايد
في ذمتي في ذمتي ماتوّفيه=كل البيوت النادره والفرايد
وابوي له حقٍ علي اني انعيه=امن البيوت اللي بها الكل شايد
وقبل القصيد ابوي ماني امخليه=من كل مايرجع عليه ابفوايد
ابوي فقده صعب محدٍ يساويه=ابوي غير الكل ماله ندايد
في دفنته كل المطاليق تبكيه=تبكي على فرقاه كل البدايد
الموت فرّق بين قلبي وغاليه=واشعل بجوفي نار حر اوقايد
حطوه في قبره وعيني تراعيه=وهالوا عليه اتراب مثل الرجايد
لو يفتدى بالعمر والله لافديه=واعطيه من عمري سنينٍ جدايد
لكن قدر ربي على الخلق مقضيه=ومافيه مخلوقٍ عن الموت حايد
فقده علي صعبٍ ولاني بناسيه=طول الدهر مانسى وسيع البنايد
ياناس اشوفه كل ماحل طاريه=حتى ولو ياناس ماهوب عايد
زوله يباريني واشوفه واحاكيه=ليه العجب ؟ ياناس هاذي وكايد
كنّي بصوته والتفت له واناديه=لبيه ياراسٍ على العز رايد
لبّيت له ماجاوب اللي يلبيه=وعوّد صدى صوتي وهمي تزايد
والحزْن طاويني وبانت مواريه=على عيونٍ غرّقن الوسايد
مِن عقب ابن عامر علي مَن يواسيه ؟=مَن غير ابوي اللي يشيل النكايد
مرحوم ياللي طيّباتٍ معانيه=يارب تَرْزِقْه الجنان البرايد
يالله عسى الفردوس اول مواطيه=وتِنْجيه ياربي نهار الشدايد
وبافعال خيراته مع الناس تجزيه=وبْوَصْلَه الارحام قرْب وبعايد
وطالبْك ياربٍ كريمٍ نناجيه=ترحم ابوي اللي سكن باللحايد

صح الله لسان الشاعر : قال وأجاد وابدع
والله يرحم شايبه ويسكنه فسيح الجنان اللهم آمين
و ما قصرت بالنقل ياغالي ،
فعلاً قصيدة معبرة عما يختلج بالنفوس ويعتمر بالصدور
الله يرحم والدينا ووالدي كل عبد مسلم .